2017-05-22

V.PINTXO TXAPELKETA GALDAKAON


Aurten ere, azken bost urteotan bezala, V. Pintxo-txapelketa ospatu dugu Galdakaoko berbalagunok. Pepeto Kultur Elkartean geratu ginen ostiralean, 20:00etan. Batzuek bertan egin zuten pintxoa, beste batzuek etxetik ekarri zituzten eginda, eta tertulia goxoan itxaron zuten, zerbait hartzen zuten bitartean. Orotara, 11 pintxo puntuagarri aurkeztu dira bosgarren edizio honetan, zein baino zein goxoago!

Lehiaketan ostegun arratsaldeko talde bietako hamar partaidek eman zuten izena, eta hemendik aurrera taldeko beste kide bat izango den AEK-ko ikasle bat ere animatu zen. Ongi etorri, Rakel!

21:30ean hasi genuen dastaketa, papera eta bolia eskuan genituela. Zaporea, aurkezpena eta originaltasuna baloratzen ditugu urtero, eta badirudi urterik urte gorago jartzen dugula langa. Aurten, besteak beste, txipiak tipula gorrituarekin, odolostea piperrak eta galeper arrautzarekin, txorizo taloak eta zerba ezti eta berakatzarekin osatutako pintxoak geratu dira podiumetik kanpo. Kontuak atera!

Hauexek dira aurtengo brontzea, zilarra eta urrea lortu dituzten pintxoak:



1. Postua: 103 punturekin "Sagarra-manzana, ikatza-carbón..." Sagar xerra eta foie errea, tipula gorritua eta modena ozpinarekin (Rakel Dominguez)

2. Postuan: 83 punturekin "Barazki bizidunak" mota guztietako barazkia tartarra (Andoni Vargas)

3. Postuan: 67 punturekin "Galdakaoko txalupa" urdaiazpikoa, kuiatxo krema, pestoa eta pinaziak (Virginia Blasco)

Hona hemen podiumera igo ziren partaideak, puntuak zenbatzen egon ziren berbalagunekin. Irabazlearen poz aurpegiak dena esaten du, asteazkeneko berbalagun jostunek jositako amantala irabazi ondoren.

Eta hona hemen beste txapeldunen talde argazkia. Kasu honetan inoiz baino argiago geratzen delako irabaztea gutxienekoa dela. Bejondeizuela!



PIRAGUAK BILBON

Kaixo, euskaltzale!! Oraingo honetan, eguraldi ona aprobetxatuz, kanpo-ekintza bat proposatzen dizuegu: piraguak Bilbon. Maiatzaren 27an, zapatuan, egingo dugu irteera. Goizeko 10etan Nagusia kaleko metro-geltokian geratuko gara, hortik Bilbora, eta Bilboko itsas-museoan dagoen Bilbobentura enpresarekin egingo dugu ekintza; Bilboko historia, jolasak, katxondeoa...eta dena euskaraz.
Eraman beharreko bakarra toalla, aldatzeko kamiseta, bainujantzi eta txankletak dira, eta ongi pasatzeko gogoa, noski!!
Anima zaitez gurekin etortzera, ederki pasatzeko aukera galanta baita, Bilboko beste ikuspegi batez gozatzeko aukera emango diguna.
Prezioa: Berbalagunentzat 5 euro/ gainontzekoentzat 11 euro
Praktikatu eta bizi!!

2017-05-17

BASAURIKO III. MINTZODROMOA


Maiatzaren 11n ospatu genuen Basauriko III. Mintzodromoa, eta etorri ziren guztiak zoriondu nahi ditugu, inoizko arrakastatsu eta jendetsuena izan baitzen,hortaz, zorionak eta eskerrik asko bihotz-bihotzez!
Aurreko urteetan bezala Solobarria plazako karpan egin genuen ekitaldia; bai goizez, bai arratsaldez, eta orotara 180 lagun baino gehiagok                    ( euskaltegietako ikasle, berbalagun, Udaleko langile,hiritar xume...) parte hartu zuten AEK-k, Udal Euskaltegiak, Hizkuntza Eskolak eta Udalak antolatzen dugun euskararen aldeko dinamika erraldoi honetan. Beti bezala kafea eta pastak lagun izan zituzten partaideek, eta 45 minutuz euskaraz gozatzeko aukera izan zuten, baita euskaltzale gehiago ezagutzeko parada ere. Bai goizez, bai arrastiz labur egin zitzaien...gustura egon ziren seinale!!
"Umorearen mugak", "Eskola lehen eta orain" eta "Kirol arriskutsuak" gaiak jorratu zituzten mahaietako dinamizatzaileen laguntzaz, eta guztietan aritu ziren eroso eta gustura.
Aurten langa oso goian jarri dugun arren, datorren urtean errepikatu edo gainditzeko asmoz itzuliko gara, betiere zuen laguntzari esker! Eskerrik asko berriro ere bertaratutako guztiei, baita antolatzen lagundu diguzuen guztioi ere ! Gozatu euskaraz! Praktikatu euskara! Bizi euskaraz!!

2017-05-02

BASAURIKO MINTZODROMOA

Egun on Hego Uribeko euskaltzale guztioi!! Hementxe dugu Basaurin ospatuko dugun 3. Mintzodromoa eta espero dugu ahalik eta jende gehien etortzea. Aurreko ekitaldiak bezala, Solobarria plazan ospatuko dugu, bi saio izango dira, goizez zein arratsaldez, eta euskara kalera atera eta solasaldi jatorra izan nahi duen ororentzat aukera paregabea izango da. Zuen zain gaude!! Gogoratu, izena emateko azken eguna maiatzaren 4a dela!
Praktikatu eta bizi